مجھے منصف نہ کہو، کہ کتنا ہی چندہ جمع کیا تو ڈیم ہوا

تازہ ترین اطلاعات کے مطابق کونگو، ڈئنگی اور ئیبولا سے زیادہ خطرناک موذی مرض کے کئی نئے واقعات منظر عام پہ آئے ہیں۔ اس مرض کا نام ماہرین نے جنون چندہ بتایا ہے۔ دارالحکومت میں آج عدالت عظما کے ایک منصف کو دوران سماعت اس خطرناک مرض نے آ پکڑا اور قتل کے مقدمے کے دوران ڈیم فنڈ میں رقم ادائیگی کی سزا سنا دی گئی۔ اسی طرح کے ایک واقعہ میں ملک ریاض نے بلوچستان پر قبضہ کر کے لاتعداد ڈیم بنانے کا علان کیا، وفاق کی طرف سے بوجھ اترنے کا خیرمقدم۔ یہ مرض صرف پاکستانیوں تک محدود نہیں بلکہ حالیہ واقعہ میں معروف اداکارہ لنڈزے لوہن نے ایک مہاجر عورت کو یہ ہدایت کی کہ اپنا بچہ ڈیم فنڈ میں عطیہ کر دو۔

ایسے واقعات کے بعد ہم نے ماہرین سے اس مرض کے بارے میں رابطہ کیا تو ان کا کہنا تھا کے اس خطرناک مرض کی وجہ ملکی جسم میں متوقع تبدیلی کی عدم موجودگی ہے۔ ڈاکٹر عامر لیاقت (ماہر چندہ اور بچہ فروش) کا کہنا تھا کہ ملک کا تمام پیسہ جوتوں اور وردی پر لگ جانے کی وجہ سے اکثر عوام کو جنون چندہ کے مرض کا سامنا ہے، اور ایسے حالات میں مریضوں میں کسی تبدیلی کی توقع نہیں کی جا سکتی۔ انہوں نے قوم سے آیت کریمہ کا وظیفہ کرنے کی درخواست کی اور حفاظتی اقدام کے لیئے فلم غالب تجویز کی۔

اکبر بگٹی، ایک عام بلوچ، کا کہنا تھا کہ ملک ریاض کے قبضے کے بعد بلوچستان میں ایک گولف کورس بھی تعمیر کیا گیا ہے، اور روشنی والے فوارے بھی لگائے۔ ملک ریاض نے بیماری کی گرفت میں آ کے قوم سے درخواست کی ہے کہ آپ بھی ملک کے قبضے میں اپنا کردار ادا کریں اور ڈیم فنڈ میں چندہ دیں، چیف جسٹس نے اتفاق کا اظہار کیا۔